ओलीले एक पद छाड्नै पर्ने खुमलटार बैठकको निष्कर्ष

पार्टीभित्रको विवाद फुक्नुको सट्टा झन कसिंदै गएपछि सत्तारुढ नेपाल कम्युनिष्ट पार्टी (नेकपा) अध्यक्ष पुष्पकमल दाहाल ‘प्रचण्ड’ ले नेताहरुसँगको छलफललाई थप तीब्रता दिएका छन् ।

आज (सोमबार) अध्यक्ष प्रचण्डले आफ्नै निवास खुमलटारमा आफू पक्षीय स्थायी कमिटी सदस्यहरुसँग पार्टीभित्रको विवाद समाधानका विषयमा छलफल गरेका छन् । आज बिहान अध्यक्ष प्रचण्डले पूर्व माओवादी केन्द्रतर्फका स्थायी कमिटी सदस्यहरुसँग पार्टी विवाद समाधानका विषयमा झण्डै तीन घण्टा छलफल गरेका छन् । छलफललो पार्टीभित्रको विवाद हल गर्न प्रधानमन्त्री एवम् नेकपा अध्यक्ष केपी शर्मा ओली नै अग्रसर हुनुपर्ने निष्कर्ष निकालेको छ ।

‘पार्टी अध्यक्ष र प्रधानमन्त्री समेत भएको नाताले उहाँले नै निकास दिनुपर्छ र पार्टी एकतालाई पनि बचाउनु पर्छ । त्यसका लागि ओलीले अध्यक्ष वा प्रधानमन्त्रीमध्ये एक पद छोड्नु पर्छ भन्ने विषयमा नेताहरु एकमत देखिनुको भएको छ’, छलफलमा सहभागी एक नेताले भने, ‘ओलीजी प्रतिपक्ष जस्तो बन्नु भएन, घुर्की लगाउनु भएन । बैठक नराख्ने र राखे पनि बीचमै छोड्ने त कहिले महाधिवेशनको कुरा ल्याएर समस्या समाधान नभई पन्छाउने प्रयासमा लाग्नु भएको छ । यो प्रवृत्तिले निकास आउँदैन । त्यसैले उहाँले नै निकास दिन जरुरी छ ।’

नेकपाको स्थायी समिति बैठक भोलि मंगलबार बस्दैछ । बैठकअघि रणनीति बनाउन प्रचण्ड पक्षका नेताहरुबीच छलफल भएको हो । पार्टी फुट्नु हुँदैन । पार्टी र सरकार दुवै चल्नुपर्छ । त्यसका लागि विधानको पालनमा जोड दिनुपर्छ भन्ने विषयमा विभिन्न कोणबाट छलफल भएको स्थायी कमिटी सदस्य लिलामणि पोखरेलले जानकारी दिए ।

आजको छलफलमा पार्टी एकता बलियो बनाउने, एकता प्रक्रियालाई टुंग्याउने र महाधिवेशनबारे बाहिर भएका चर्चालगायतका विषयमा छलफल भएको स्थायी कमिटी सदस्य देवेन्द्र पौडेलले जानकारी दिएका छन् । आइतबार पनि सचिवालयका चार सदस्यसहित माधवकुमार नेपाल पक्षका केही स्थायी कमिटी सदस्यहरुसँग प्रचण्डले पार्टी विवाद समाधानाक विषयमा छलफल गरेका थिए ।

आज (सोमबार) को छलफलमा सहभागी नेताहरुले पछिल्लो पटक सचिवालय बैठकमा प्रस्तावका रुपमा आएको ‘अर्ली महाधिवेशन’ का बारेमा प्रचण्डसँग जिज्ञासा राखेका थिए । जवाफमा प्रचण्डले अर्ली महाधिवेशनका बारेमा ओलीसँगै कुनै सहमति नगरेको दोहोर्‍याएका थिए ।

‘मंसिरमा महाधिवेशन गर्ने प्रधानमन्त्री एवं अर्का अध्यक्ष केपी शर्मा ओलीको प्रस्ताव, सचिवालय र शीतल निवासमा भएको छलफलबारे नेताहरुलाई ब्रिफिङ गरेका थिए । आफूले महाधिवेशन गर्ने प्रस्तावमा सोच विचार गर्न सकिन्छ भनेको भन्दै उनले ‘वैचारिक विषय टुंगिएको छैन । छोटो समयमा भ्याइन्न कि जस्तो लागेको छ । तै पनि साथीहरुसँग छलफल गर्न सकिन्छ भनेको हुँ’, प्रचण्डको भनाई उद्धगृद गर्दै एक नेताले भने ।

उनले भने, ‘बाहिर ‘पदका लागि झगडा थियो, पद मिलेपछि सहमति भयो’ भने जसरी प्रचार भएको उनको गुनासो थियो । अब वैचारिक र जनतासँग जोडिएको मुद्दामा बढी केन्द्रित हुनुपर्नेमा जोड दिएको एक स्थायी कमिटी सदस्यले बताए ।

बैठकमा नेताहरुले पनि अहिले ‘फाइट टु फिनिस’ भनेर जाँदा पार्टी नै फुट्न सक्ने र पदकै लागि पार्टी फुटाएको आरोप लाग्नसक्ने भन्दै स्थायी कमिटी बैठकलाई नियमित एजेण्डामा फर्काएर सेफल्याण्डिङ गर्न सुझाव दिएका छन् । जवाफमा प्रचण्डले पनि ओलीसँग एकता, संघर्ष र एकताकै आधारमा अगाडि बढ्ने बताएका थिए ।