लकडाउनबाट दिक्क बनेका एक व्यक्तिले मेयरलाई गोली देखाउँदै सडकमा नाङ्गै दौडाएपछि

काठमाडौं । कोरोना भाइरसको महामारी झनै उग्र बन्दै गएपछि अधिकांश देशहरुले लकडाउनको समय थप्दै गएका छन् । फ्रान्समा पनि कोरोनाको महामारीलाई मध्यनजर गर्दै लकडाउन थप गरेको छ ।

कोरोना भाइरसको महामारीका कारण यो समाचार तयार पार्दासम्म फ्रान्समा १९ हजार ३२३ जनाको ज्यान गएको छ भने १ लाख ५१ हजार ७९३ जनालाई संक्रमण भएको छ ।

यसैबीच फ्रान्सको बिहोरेल शहरमा लकडाउन लम्बिँदै गएपछि हैरान भएका एक व्यक्तिले शहरका मेयरको घरमा गएर बन्दूक तेर्स्याएका छन् । त्यतिमात्रै होइन, उनले मेयरलाई लुगा खोल्न लगाएर नाङ्गै दौडिन लगाएका छन् ।

फ्रान्सको उत्तरी ईलाकामा पर्ने नर्मान्डी क्षेत्रको बिहोरेल शहरका ५३ वर्षीय मेयर पास्कल हूब्रोंलाई एक स्थानीय बासिन्दाले त्यसो गर्न लगाएका अन्तर्राष्ट्रिय सञ्चारमाध्यमहरुले बताएका छन् ।

मेयर घरैमा बसेर काम गरिरहेका बेला बन्दूकधारीले गोजीबाट बन्दूक निकालेर मेयरतिर तेर्स्याउँदै सबै कपडा खोलेर दौडाउन लगाएको उनले बताएका छन् ।

उनले भने, ‘म काम गरिरहेको थिएँ, त्यहि बेला त्यो मानिस आएर बन्दुक तेस्र्यायो र मलाई सबै कपडा खोल्न लगाएर दौडायो, त्यसपछि उसले मेरो फोटो खिच्यो ।’

आक्रमणकारीबाट बल्ल बल्ल भाग्न सफल भएका मेयर ज्यान बचाउन सडकमा नाङ्गै दौडिएका थिए ।