सांसदलाई युवराज खतिवडाको जवाफ– पदमा नरहे पनि गुजारा चल्छ, पद मागेर लिएको होइन

अमेरिकाका लागि प्रस्तावित राजदूत डा. युवराज खतिवडाले पदमा नरहे पनि गुजारा चल्ने भएकाले आफूले मागेर पद नलिएको बताएका छन् । बिहीबार संसदीय सुनुवाइ समिति बैठकमा उनले आफूले मागेर पद नलिएको जिकीर गर्दै राज्यले जिम्मेवारी दिएको बताए ।

राज्यले कुनै पद नदिए पनि गुजारा चल्ने र आफूले मागेर पद नलिएको, तर राज्यले जिम्मेवारी दिएको भन्दै प्रस्तावित राजदूत डा. खतिवडाले भने, मैले पद मागेर लिएको होइन । राजनीतिक नियुक्ति राज्यले दिएर आएको हुँ । पदमा नरही गुजारा नचल्ने पनि होइन मेरो । मेरो अनुभवले राज्यले जिम्मेवारी दियो ।’

राज्यले दिएको दायित्व पूरा गर्नु आफ्नो कर्तव्य रहेको बताएका उनले अहिले राज्यले अमेरिकारको राजदूतको जिम्मेवारी दिएको जानकारी दिए ।

राष्ट्रिय योजना आयोगका उपाध्यक्ष, राष्ट्र बैंकको गभर्नर, राष्ट्रिय सभा सदस्य, अर्थमन्त्री, प्रधानमन्त्री केपी शर्मा ओलीको विशेष आर्थिक सल्लाहकारको जिम्मेवारी रहिसकेका उनलाई सांसदहरुले पदमा मात्रै बसिरहन खोजेको आरोप लगाएका थिए ।

यसको जवाफ स्वरुप उनले आफूले मागेर कुनै पद नलिएको, तर राज्यले दिएको जिम्मेवारी पूरा गरेको बताए ।